2017 پاکستان کرکٹ کیلئے خوشیوں بھرا سال

  وقت اشاعت: 29 2017

لاہور: سال 2017 پاکستان کرکٹ کے لئے خوشیوں بھرا سال رہا، قومی ٹیم نے پہلی بار چیمپئنز ٹرافی جیتی جب کہ ملک میں انٹرنیشنل کرکٹ کی واپسی ہوئی۔

پاکستان کرکٹ ٹیم 2017کا اچھا آغاز نہیں کرپائی، آسٹریلیا کیخلاف ون ڈے سیریز کے 5 میچز میں ایک فتح ہی ہاتھ آسکی جس کے بعد  کپتان اظہر علی کو تبدیل کرنے کا مطالبہ زور پکڑگیا، فروری میں پی ایس ایل کے دوسرے ایڈیشن کے پہلے میچ کیساتھ ہی اسپاٹ فکسنگ اسکینڈل نے طوفان پرپا کیا، مارچ میں دورہ  ویسٹ انڈیز کیلیے ٹی ٹوئنٹی کپتان سرفراز احمد کو ون ڈے فارمیٹ میں بھی قیادت سونپ دی گئی جب کہ پاکستان ٹیم نے کیریبیئنز کو پہلی بار انہی کی سرزمین پر ٹیسٹ سیریز میں ہرا کر ریٹائرمنٹ کا اعلان کرنے والے سینئرز مصباح الحق اور یونس خان کو شاندارالوداعی تحفہ پیش کیا۔

بعد ازاں سرفراز احمد کی قیادت میں گرین شرٹس نے ون ڈے سیریز 2-1اور ٹی ٹوئنٹی سیریز جیتی، ان فتوحات کے باوجود عالمی رینکنگ میں آٹھویں نمبر پر موجود پاکستان کی ورلڈ کپ 2019میں براہ راست رسائی یقینی نہیں تھی، چیمپئنز ٹرافی میں دنیا کی 8 بہترین ٹیموں میں آخری نمبر پر موجود گرین شرٹس بھارت کیخلاف میچ میں ترنوالہ ثابت ہوئے لیکن اس کے بعد شاندار کم بیک کرتے ہوئے جنوبی افریقہ، سری لنکا کو زیر کرکے سیمی فائنل میں جگہ بنائی جہاں فیورٹ انگلینڈ کو روند ڈالا جب کہ فائنل میں پاکستان نے میگاایونٹس میں بھارت کے ہاتھوں مات کھانے کی تاریخ بدل ڈالی۔

فخززمان کی سنچری اننگز نے شائقین کے دل جیت لیے، محمد عامر نے یادگار اسپیل میں ویرات کوہلی سمیت 3مہرے کھسکائے، باقی کام ایونٹ کے بہتر بولر حسن علی اور دیگر نے کردیا جس کے بعد فاتح کرکٹرز پر انعامات کی برسات ہوئی۔

مصباح الحق اور یونس خان کے بغیر پہلی ٹیسٹ سیریز میں قیادت سرفراز احمد کو سونپی گئی، سری لنکا نے دونوں میچز میں شکست دیدی، یہ پہلا موقع تھا کہ گرین کیپس یو اے ای میں کسی ٹیسٹ سیریز میں ناکامی سے دوچار ہوئے، ون ڈے سیریز میں پاکستان نے آئی لینڈرز کو 5-0سے کلین سوئپ کیا، یواے ای میں دونوں ٹی ٹوئنٹی میچز بھی جیتے جب کہ لاہور میں بھی گرین شرٹس سرخرو ہوئے، ورلڈ الیون کی آمد اور سری لنکا سے اس میچ کی بدولت ملک میں انٹرنیشنل کرکٹ کی واپسی ہوئی۔

گرین شرٹس نے مجموعی طور پر رواں سال 18ون ڈے میچ کھیلے، 12 میں فتح پائی، 6 میں شکست ہوئی، ان میں گزشتہ 9میچز میں مسلسل فتوحات شامل ہیں، گزشتہ برس11میں سے 6 مقابلوں میں ناکامی ہوئی تھی،گرین شرٹس کا سب سے بڑا اسکور 4وکٹ پر338 بھارت کے خلاف چیمپئنز ٹرافی فائنل میں رہا،کم سے کم مجموعہ بھی بلوشرٹس کیخلاف اسی ایونٹ کے پہلے میچ میں 164بنا، بابر اعظم 67.07کی ایوریج سے 872رنز بنا کر سرفہرست رہے،محمد حفیظ 555،شعیب ملک 516رنز کیساتھ ٹاپ تھری میں شامل ہیں۔

گزشتہ سال کی سب سے بڑی اننگز 125بابر اعظم نے  کھیلی، نوجوان بیٹسمین نے 4 سنچریز بنائیں، فخر زمان ‘ شعیب ملک اور امام الحق ایک ایک تھری فیگر اننگز تراشنے میں کامیاب رہے۔

بولرز میں حسن علی 45،جنید خان اور شاداب خان 19،19، محمد عامر 18، عماد وسیم 9 وکٹ لے سکے، بہترین بولنگ فیگرز میں بھی حسن علی سرفہرست رہے، انھوں نے  10 اوورزمیں34رنز کے عوض 5 جبکہ عثمان خان شنواری نے 7 اوورز میں 34 رنز دے اتنے ہی شکار کیے، دونوں کے عتاب کا نشانہ سری لنکن بیٹسمین بنے۔

حسن علی نے اپنی شاندار کارکردگی کی بدولت آئی سی سی کی ون ڈے رینکنگ میں نمبر ون پوزیشن حاصل کی، بابر اعظم سال کا اختتام چوتھی پوزیشن پر جبکہ بولنگ ایکشن پر پابندی کے باوجود محمد حفیظ آل راؤنڈرز میں سرفہرست ہیں۔

2017 میں پاکستان کے کئی سپر اسٹارز نے انٹرنیشنل کرکٹ کو الوداع کہا جن میں مصباح الحق اور یونس خان نمایاں ہیں، دونوں نے اپنے کیریئر کے آخری ٹیسٹ سیریز رواں برس ویسٹ انڈیز میں کھیلی اور پاکستان کو پہلی بار کیریبیئن جزائر پر ٹیسٹ سیریز کامیابی سے ہمکنار کیا۔ ٹیم سے کافی عرصے سے دور شاہد خان آفریدی اور سعید اجمل نے باضابطہ طور پر اپنے انٹرنیشنل کیریئر کے اختتام کا اعلان کیا۔

پاکستان نے رواں سال 6 کرکٹرز شاداب خان، فخر زمان، فہیم اشرف، رومان رئیس، امام الحق اور عثمان خان شنواری کو ون ڈے کیپ دی‘ ان میں سے ہر ایک نے اپنا انتخاب درست ثابت کیا، فخر زمان نے چیمپئنز ٹرافی کا میلہ لوٹا، امام الحق نے ڈیبیو پر سنچری بنائی، عثمان خان شنواری نے پہلے میچ میں 5شکار کئے، رومان رئیس اور شاداب خان نے بھی فتوحات میں اہم کردار ادا کیا۔

آپ کا تبصرہ

Donald Trump's policy towards Pakistan

Donald Trump's; the president of US war of tweets was a fierce attack on Pakistan, accusing the country of "lies and deceit" and making "fools" of US leaders. Trump decla

Read more

loading...